நெல் விவசாயிகளின் அறைகூவல்

நெல்லின் அடக்கவிலையின் விலையை உயர்த்தி,                                                  விதை தர மசோதாவை அரசு நிராகரிக்க வேண்டும்..

புத்ரஜெயா – 27 ஜனவரி 2025

நாடு முழுவதும் பல்வேறு இடங்களிலிருந்து நூற்றுக்கணக்கான நெல் பயிற்செய்யும் விவசாயிகள் இன்று வேளாண்மை மற்றும் உணவுப் பாதுகாப்பு அமைச்சகத்தின் முன் ஒன்று திரண்டு தங்களின் எதிர்ப்பை தெரிவித்தனர்.  நெல்லின் அடிப்படை விலையை அதிகரிக்குமாறு அரசாங்கத்தை வலியுறுத்தவும், சிறு விவசாயிகளைப் பாதிக்கும், பயிர்களுக்கான விதை தர மசோதாவுக்கு (RUU) தங்கள் எதிர்ப்பைத் தெரிவிக்கவும் அவர்கள் அங்கு ஒன்று கூடினர். 

நெல்லின் விலையை மெட்ரிக் டன்னுக்கு RM1,300 லிருந்து RM1,800 ஆக அரசாங்கம் உயர்த்த வேண்டும் என்று விவசாயிகள் கோருகின்றனர்.

"இக்காலக்கட்டத்தில் ஒரு மெட்ரிக் டன்னுக்கு RM1,300 என்ற அடிப்படை விலை நியாயமற்றது மற்றும் இனி அது பொருந்தாது என்றும், ஏனெனில் டீசல் மற்றும் விதை உள்ளிட்டச் செலவுகள் அதிகரித்ததைத் தொடர்ந்து நெல் உற்பத்தி செலவு அதிகரித்து வருவதன் யதார்த்தத்தை இது பிரதிபலிக்கவில்லை," என்றும்  Pertubuhan Persaudaraan Pesawah Malaysia (PESAWAH) இயக்கத்தின் தலைவர் அப்துல் ரஷீத் யோப் கூறினார்.

 "நெல் விவசாயிகளின் பிழைப்பை உறுதி செய்வதற்கும், நாட்டின் உணவு விநியோகத்தை உறுதி செய்வதற்கும் நெல்லின் அடிப்படை விலையை அதிகரிப்பது முக்கியமானது." என்று அவர் மேலும் கூறினார். 

தற்போது நடப்பில் இருக்கும் நெல்லின் அடக்கவிலை 2023 ஆம் ஆண்டில் நிர்ணயிக்கப்பட்டதாகும்.  இருந்தபோதிலும், 2023 முதல், விவசாயிகள் சுமக்க வேண்டிய பல்வேறு செலவுகள் கண்மூடித்தனமாக உயர்ந்துள்ளன. 2023 ஆம் ஆண்டிலிருந்து நெல் விதைகளின் விலை இரண்டு மடங்கு அதிகரித்துள்ளது, அதாவது, 2023 -ல் 20 கிலோவிற்கு RM45 வெள்ளியிலிருந்து  தற்போது 20 கிலோவிற்கு RM58 ஆக  சமீபத்தில் அதிகரிக்கப்பட்டுள்ளது. 

அதோடு, டீசல் மானியங்கள் அகற்றப்பட்டதால் உழவு மற்றும் அறுவடை செலவுகளும் அதிகரித்துள்ளன. இதனால் விவசாயிகள் டீசல் மானியங்கள் (fleet cards) பெறாததால், இயந்திர உரிமையாளர்களால் வசூலிக்கப்படும் உழவு இயந்திரங்களின் செலவுகளை அதிகமாகச் சுமக்க வேண்டிய கட்டாயம் ஏற்பட்டுள்ளது.

மேலும், கடந்த காலங்களில், நில வாடகை செலவுகளும்  மொத்த விகிதத்தில் அதிகரித்துள்ளன, இது மாநிலத்திற்கு மாநிலம் மாறுபடுகிறது என்பது இங்கு குறிப்பிடத்தக்கது. இரண்டு ஆண்டுகளுக்கு முன்பு இருந்ததை விட, ரசாயன பூச்சிக்கொல்லிகளின் விலையும் கிட்டத்தட்ட 4 மடங்கு அதிகரித்துள்ளன. அதைத் தவிர, நெல் வயல் பராமரிப்பு செலவும் அதிகரித்துள்ளது.

"நாங்கள் இன்று இங்கு கோரி நிற்பது நியாயமானது மற்றும் பொருத்தமானது" என்று அப்துல் ரஷீத் யோப் செய்தியாளர்களை சந்திக்கும்போது கருத்து தெரிவித்தார். அவர் தொடர்ந்து பேசும்போது

"நெல்லின் விலை ஒரு மெட்ரிக் டன்னுக்கு RM1,800 ஆக அதிகரிப்பது, விவசாயிகள் தங்கள் நெல் வயல்களில் தொடர்ந்து பயிரிடவும், உற்பத்தித்திறனை அதிகரிக்கவும் ஊக்கத்தை அளிக்கும். எங்களின் இந்தக் கோரிக்கையின்படி, நெல் விலையை RM1,800 ஆக உயர்த்துவதற்கு அரசாங்கம் ஒப்புதல் அளிக்க முடியாவிட்டால், PeSAWAH அமைப்பு மாற்று வழிகளை முன்மொழிகிறது. 

- நெல் உற்பத்தியின் அதிக செலவை ஈடுசெய்ய நெல் விலை மானியத்தை டன்னுக்கு RM500 அதிகரிக்க வேண்டும்.

- உழவு மற்றும் அறுவடை இயந்திர சேவைகளின் விலையைக் குறைத்தல் 

- நெல் விவசாய இடுபொருட்களின் செலவையும் குறைத்தல் 

- விதைகள், உரங்கள் மற்றும் பூச்சிக்கொல்லிகள் போன்ற இடுபொருட்களின் விலையைக் குறைத்தல் 

- விவசாயிகள் நெல் விதைகளைச் சேமிக்கவும், பகிர்ந்து கொள்ளவும், விற்கவும் அனுமதித்தல்.

மேற்கூறிய இந்த 5 நடவடிக்கைகளால், அதிக விலையை வசூலிக்கும் சப்ளையர்களை விவசாயிகள் சார்ந்திருப்பதைக் குறைக்க முடியும்.

நாடாளுமன்றத்தில் தாக்கல் செய்யப்படவுள்ள பயிர்கள் தொடர்பான விதை தர மசோதாவிற்கும் விவசாயிகள் எதிர்ப்பு தெரிவித்து வருகின்றனர். இந்த மசோதாவின்படி, தாவர விதைகளை பதப்படுத்தி விநியோகிக்கும் ஒவ்வொரு நபரும் உரிமம் பெற்று, விதை மாதிரிகளை சரிபார்ப்பு சோதனைக்காக ஆய்வகத்திற்கு அனுப்ப வேண்டும். உரிமம் இல்லாமல் விதைகளை சேமித்து விநியோகிப்பவர்களுக்கு விதிக்கப்படும் தண்டனை RM100,000 வெள்ளி அபராதம் மற்றும் 3 ஆண்டுகள் சிறைத்தண்டனை கிடைக்க வகை செய்கிறது. 

"இந்த மசோதா இந்த நாட்டில் உள்ள விவசாயிகளுடன் எந்த  ஆலோசனையும், கருத்து பறிமாற்றங்களும் இல்லாமல் வரைவு செய்யப்பட்டுள்ளது. விதை வாங்குபவர்கள் ஏமாற்றப்படுவதைத் தடுக்கும் இந்த மசோதாவின் நோக்கம் பாராட்டத்தக்கது தான். இருப்பினும், சிறு விவசாயிகள் உட்பட விதைகளை சேமித்து விநியோகிக்கும் அனைத்து தனிநபர்களுக்கும் உரிமம் வழங்குவதும், வேளாண்மைத் துறைக்கு அறிவிப்பதும் மிகையான செயலாகும், மேலும் இந்த மசோதாவால்  பெருநிறுவனங்கள் ஏகபோகத்துக்கு  வலுசேர்க்கும்" இவ்வாறு அப்துல் ரஷீத் யோப் தெளிவு படுத்தினார்.

முன்மொழியப்படவுள்ள  விதை தர மசோதாவை நெல் விவசாயிகள் கடுமையாக எதிர்ப்பதாகவும், இந்த மசோதா அவர்களைப் போன்ற சிறு விவசாயிகளுக்கு மிக சுமையாக அமையும் என்றும் அவர்கள் உறுதியாகக் கூறினார். 

"நாங்கள் அரசின் பார்வைக்கு கொண்டு வந்திருக்கும் இந்தப் பிரச்சினையில் அரசாங்கம் தீவிர கவனம் செலுத்தி, நெல் விவசாயிகளின் நிலைத்தன்மை மற்றும் நல்வாழ்வையும், நாட்டின் உணவுப் பாதுகாப்பையும் உறுதி செய்ய உரிய நடவடிக்கை எடுக்கும் என்று நம்புவதாக விவசாயிகள் நம்பிக்கை தெரிவித்தனர். 

இன்றைய போராட்டம் முதலில் பிரதமர் அலுவலகத்திற்கு முன்பாக நடத்த திட்டமிடப்பட்டது, ஆனால் இந்தோனேசிய ஜனாதிபதியின் பிரதமர் அலுவலகத்திற்கான அதிகாரப்பூர்வ வருகைக்கு இடையூறு ஏற்படுவதைத் தவிர்ப்பதற்காக விவசாயம் மற்றும் உணவுப் பாதுகாப்பு அமைச்சகத்திற்கு மாற்றப்பட்டது. இருப்பினும், விவசாயிகளின் கோரிக்கைகள் அடங்கிய மகஜர் பிரதமரின் அரசியல் செயலாளராக இருக்கும் சான் மிங் காய்-யிடம் சமர்ப்பிக்கப்பட்டது.

இன்று விவசாயிகளுடன் இந்தப் போராட்டத்தில் மர்ஹைன் ஆர்வலர்கள் மற்றும் மலேசிய சோசலிஸ்ட் கட்சியின்  தேசியத் துணை தலைவர் S. அருட்செல்வன் மற்றும் PSM -இன் தேசிய பொருளாளர் சோஹ் சூக் ஹ்வா உட்பட பல தன்னார்வளர்கள் விவசாயிகளுக்காக களம் இறங்கினர். 

தை பிறந்தது, வழி பிறக்குமா ?

தை பிறந்தால் வழி பிறக்கும் என்பார்கள்.  இதை எழுதிக் கொண்டிருக்கும் வேளையில், காசாவில் புது வழி ஒன்று பிறந்திருக்கிறது.  காசாவில் போர் நிறுத்தம் உடன்படிக்கை ஒப்பந்தத்தை இரு தரப்பினரும் ஏற்றுக் கொண்டிருப்பதாக தெரிவிக்கப்பட்டுள்ளது. இது ஒரு முழு வெற்றி இல்லாவிட்டாலும், இந்த வெற்றி இப்பொழுது தேவைப்படுகிறது என்று எடுத்துக் கொள்ளலாம். இந்தப் போர் நிறுத்தம் உயிர் நீத்த 40 ஆயிரத்திற்கும் மேற்பட்ட பாலஸ்தீனிய சாமானிய மக்களுக்கே உரியது.  இஸ்ரேல் மற்றும் மற்ற ஏகாதிபத்திய சக்திகளுக்கு எதிரான போராட்டம் மீண்டும் உயிர் பெற மேலும் பல வழிகள் பிறக்கும் என நம்புகின்றோம்.

பொங்கல் ஓர் உழவர் திருநாள்,  உழைக்கும் வர்க்கத்தின் திருநாள். இந்தப் பொங்கல் திருநாள், தினம்தோறும் 8 மணி நேரத்திற்கு மேல் வேலை செய்யும் கூலி தொழிலாளர்களுக்கு மட்டுமில்லாமல் ஒத்துமொத்த சமுதாய மேம்பாட்டிற்கும் உழைக்கின்ற தொழிலாளி வர்க்கத்திற்கே உரியது ஆகும். ஆனால், இந்த நாட்டில் தொழிலாளி வர்க்கத்திற்கு உரிய அங்கீகாரமும் சலுகைகளும் கிடைக்கின்றனவா என்பதே ஒரு பெரிய கேள்விக்குறி.

நாம் இப்பொழுது 2025-இல் இருக்கின்றோம்.  நமது குறைந்தபட்ச சம்பளம் இப்பொழுது தான் RM1500 இருந்து RM1700 ஏற்றம் கண்டுள்ளது.  நமது பிரதமர் அறிவித்துள்ள இந்த RM200 ஏற்றம்  முந்தைய ஏற்றத்தை காட்டிலும் குறைந்ததே ஆகும். டத்தோ ஶ்ரீ இஸ்மாயில் சப்ரி (DS Ismail Sabri)  பிரதமராக பணிபுரிந்த காலத்தில்  குறைந்தபட்ச சம்பளம் RM300 ஏற்றம் கண்டது. இதில் வருத்தம் என்னவென்றால் இந்த குறைந்த பட்ச சம்பளத்தின்  விடயங்களில் இரண்டே வகையான உரையாடல்களே பெரிதாக இடம்பெற்றன.  

• ஒரு கூட்டம் ஏன் இந்த ஏற்றம் என்று அரசாங்கத்தை கேள்வி கேட்டது.

•  இன்னொரு கூட்டம் இந்த RM1700  ஏற்றத்தை வைத்து தன்னை தொழிலாளிகளுக்கான அரசு என்ற பிம்பத்தை கட்டி எழுப்ப முற்பட்டது.

ஆனால் யாரும் இந்த வேளையில், குறைந்தபட்ச சம்பளம் எடுக்கும் தொழிலாளிகளிடம் இந்த ஏற்றம் போதுமான ஒன்றாக இருக்கிறதா என்ற கேள்வியை முன்வைக்கவில்லை என்பது வருத்தமான ஒரு சூழ்நிலை.  அரசாங்கத்தின் சொந்த குறைந்தபட்ச சம்பளம் கணக்கீட்டின் வழி ஒரு தொழிலாளிக்கு கிடைக்க வேண்டிய சம்பளம் RM2,444.  மலேசிய சோசலிசக் கட்சி (PSM) RM2000  எனும் கோரிக்கையை முன் வைத்தது.  இந்த கோரிக்கையை தொழிற்சங்கங்களும் ஆதரித்தன.  அனைத்துலக ஆணையமான, UNICEF, RM2,100 எனும் கோரிக்கையை முன் வைத்தது. அனைத்து கோரிக்கைகளும் ஏற்றுக் கொள்ளப்படாமல் சொற்பமான ஏற்றத்தையே இந்த அரசாங்கம் கொடுத்திருக்கிறது.

தொழிலாளிகளின் சம்பளம் ஒரு புறம் இருக்க, நமது உணவு உற்பத்தியோ ஒரு கவலைக்கிடமான சூழ்நிலையில்தான் உள்ளது. 2023-ஆம் ஆண்டில் நமது நாடு இறக்குமதி செய்த உணவு RM75.54 billion ஆகும்.  இதை நாம் எப்படி எதிர்கொள்ள இருக்கிறோம்  என்ற  துளி அளவும் அக்கறையில்லாத அரசாங்கத்தைதான் நாம் இன்று பார்த்துக் கொண்டிருக்கின்றோம். அதிகப்படியான இறக்குமதியை நம்பி இருக்கும் நாம், நமது சொந்த சிறு விவசாயிகளை அங்கீகரிக்கிறோமா என்ற கேள்வியை எழுப்ப வேண்டியுள்ளது.

நமது பிரதமரின் சொந்த நாடாளுமன்ற தொகுதியில், அதிகமான விவசாயிகள் அவர்கள் உழைப்பை  செலவிடுகின்ற நிலத்திலிருந்து அப்புறப்படுத்தும் முயற்சியினை மேற்கொண்டு வருகிறது. நாடாளுமன்றத்தில் அரசாங்கம் தனது செலவினை குறைத்துக் கொள்ள எண்ணுவதாக ஒரு பக்கம் கூறிக் கொண்டிருக்கும் இவ்வேளையில் சிறு விவசாயிகளை அப்புறப்படுத்துவது எந்த வகையில்  அரசாங்கத்தின் இந்த முயற்சியை வெற்றி அடைய செய்யும் என்பது எங்களுக்கு தெரியவில்லை. 

தொழிலாளியின் சம்பள உயர்வு என்பது அந்தந்த நாட்டில் தொழிற்சங்கங்கள் எவ்வளவு தீவிரமாக  செயல்படுகின்றன என்பதை வைத்தே அமைந்துள்ளது.  எந்த நாட்டில் தொழிலாளிகள் தொழிற்சங்கத்தின் கீழ் அதிகமாக ஒருங்கிணைக்கப்பட்டுள்ளனரோ அங்கே சம்பளம் அதிகமாகவே வழங்கப்பட்டு வருகிறது. நமது நாடு தொடர்ந்து குறைந்த அளவிலேயே சொற்பமான சம்பளத்தை வருட கணக்கில் நிலை நிறுத்துவதற்கு காரணம் 6% குறைவான தொழிலாளர்களே தொழிற்சங்கத்தின் கீழ் ஒருங்கிணைக்கப்பட்டுள்ளனர். இந்த அரசாங்கம் இந்த எண்ணிக்கையை அதிகப்படுத்துவதில் நாட்டம் கொண்டிருப்பதாக கூறி இருந்தாலும் கூட இத்தனை நாட்களாக இவர்கள் அரசாங்கத்தில் இருந்து இதற்கான என்ன நடவடிக்கை எடுத்தார்கள்  என்ற கேள்வியை இதன் வழி முன்வைக்க விரும்புகிறோம்.

ஆகவே இந்தப் பொங்கல் ஒரு தொழிலாளியின் உழைப்பை மற்றும் இயற்கைக்கு நன்றி தெரிவிப்பதற்கு மட்டும் கொண்டாடாமல் ஒரு தொழிலாளியின் மேல் நிகழ்த்தப்படும் உழைப்புச் சுரண்டலை எப்படி கையாள வேண்டும் என்ற பார்வையையும் நாம் வளர்த்துக் கொள்ள முன் வரவேண்டும். முதலாளி வர்க்கத்தில் கேட்கப்படும் கேள்விக்கும் முன்னிலைப்படுத்தப்படும் கோரிக்கைகளுக்கும் உடனே செவிசாய்க்கின்ற நிலைமை மாறி,  தொழிலாளிகளுக்கான, சாமானிய மக்களுக்கான அரசாங்கம் வரும் என்ற நம்பிக்கையோடு இந்தப் பொங்கலை அனைவரும் கொண்டாடி இந்தப் புதிய  வருடத்தில் காலடி எடுத்து வைப்போம்.

அனைவருக்கும் மலேசிய சோசலிசக் கட்சியின் சார்பில் பொங்கல் திருநாள் நல்வாழ்த்துகள்.

காந்திபன்

மலேசிய சோசியலிச கட்சி மத்திய செயற்குழு உறுப்பினர்

3.35am, 16th January 2025

பிஎஸ்எம் அறிக்கை: 31 டிசம்பர் 2024, புத்தாண்டு வாழ்த்துகள் 2025

புதிய உறுதிப்பாடு மற்றும் உற்சாகத்துடன் பழைய சவால்களை எதிர்கொள்வோம்

பல்வேறு அச்சுறுத்தல்கள் மற்றும் சவால்களுடன் 2025 புதிய ஆண்டிற்குள் நாம் அடியெடுத்து வைக்கிறோம். நாட்டிலும் சரி, சர்வதேச அளவிலும் சரி, பெரும்பாலான தாழ்த்தப்பட்டவர்கள் இன்னும் பல்வேறு பிரச்சனைகளால் பாதிக்கப்பட்டுள்ளனர். விடுதலை, ஜனநாயகம், பொருளாதார சமத்துவம், சமூக நீதிக்கான மக்கள் போராட்டம் தொடர வேண்டும். இல்லையெனில், நெருக்கடி இன்னும் மோசமாகி, சாதாரண மக்கள் தொடர்ந்து பாதிக்கப்படுவார்கள்.

மலேசியாவில் ஒற்றுமை அரசாங்கம் இரண்டு வருடங்கள்  நம்மை ஆட்சி செய்த பிறகும் மக்கள் இன்னும் குறைந்த வருமானம் மற்றும் அதிக அன்றாட செலவுகளுடன் வாழ்க்கை சவால்களை எதிர்கொள்ள வேண்டியுள்ளது. மேலும், மக்களைச் சொந்த நலனுக்காகப் பிளவுபடுத்தி சமத்துவமற்ற யுக்திகளைக் கையாளுகின்றார்கள் உயரடுக்கு அரசியல்வாதிகள்.

இந்த புதிய ஆண்டிலும் மலேசியர்கள் ஐந்து பழைய  அச்சுறுத்தல்களை சந்திக்க நேரிடுகிறது:

1. கடினமான மற்றும் சுமை நிறைந்த சமூகப் பொருளாதார வாழ்க்கை

இன்றைய இக்கட்டான பொருளாதார சூழ்நிலையில் சாமானிய மக்கள் பல தரப்பட்ட பிரச்சனைகளைச் சந்திக்க நேரிடுகிறது. ஊதியம் குறைவாக இருப்பினும் அன்றாட செலவுகள் அதிகரித்து வருகிறது. ஐந்து அல்லது அதற்கு மேற்பட்ட தொழிலாளர்களைக் கொண்ட நிறுவனங்களின் முதலாளிகளால் பணியமர்த்தப்படும் அனைத்து தொழிலாளர்களுக்கும் 1 பிப்ரவரி 2025 முதல் குறைந்தபட்ச ஊதிய விகிதம் மாதம்  RM1,700 ஆக உயர்த்தப்படும் என்று அறிவிக்கப்பட்டாலும், ஏற்கனவே அதிக சுமைகளால் பாதிக்கப்பட்ட தொழிலாளர்களுக்கு இவை போதுமானதாக இல்லை.

குறைந்த ஊதிய விகிதம் தொழிலாளர்களை நீண்ட நேரம் வேலை செய்ய அல்லது பகுதி நேரமாக வேலை செய்யத் தூண்டுகிறது. இது மக்களின் வாழ்க்கைத் தரத்தைப் பாதிக்கும் என்பது உறுதி.

குறைந்த ஊதியம் மட்டுமின்றி மலேசியாவில் உள்ள தொழிலாளர்களின் வேலை பாதுகாப்பு மோசமாகி வருகிறது. கிக் பொருளாதாரத் துறையின் விரிவாக்கம் மற்றும் பொதுத்துறை உட்பட பல்வேறு துறைகளில் தொழிலாளர்களைத் தனியார் நிறுவனங்களின் மூலம் பணியமர்த்துவதால் வேலை பாதுகாப்பின்றி தொழிலாளர்கள் அல்லாடுகின்றனர். (உதாரணத்திற்கு மருத்துவமனைகள் மற்றும் பள்ளி போன்ற அரசாங்க கட்டிடங்களில் உள்ள பாதுகாப்பு மற்றும் துப்புரவு சேவைகள்.)

அரசாங்கம் இன்னும் நவதாரளவாத "சுதந்திரச் சந்தை" எனும் கருத்தைக் கடைப்பிடித்து, மக்களின் அடிப்படை உரிமைகளைத் தனியார்த் துறைக்கு அடகு வைக்கும் தனியார்மயமாக்கல் கொள்கைகளை நடைமுறைப்படுத்துவதால் மக்களின் வாழ்க்கைத் தரம் மேலும் பாதிக்கப்படுகிறது. சுகாதாரம், கல்வி மற்றும் உள்கட்டமைப்பு போன்ற முக்கிய துறைகளில் "பொது தனியார் கூட்டான்மையை" (பிபிபி) ஊக்குவிப்பதில் மடானி அரசாங்கத்தின் உற்சாகம், தொடர்ந்து அதிகரித்து வரும் கட்டணங்களால் அடிப்படை சேவைகளுக்காக மக்கள் சஞ்சலப்படும் அதே நேரத்தில் முதலாளித்துவ வர்க்கம் பயனடைந்து கொண்டிருக்கிறது. இது நமது சமூகத்தில் உள்ள செல்வ இடைவெளியை மேலும் அதிகரிக்கச் செய்யும் என்பது உறுதி.

"முழு கட்டண நோயாளி சேவைகள்" போன்ற திட்டங்களின் மூலம் அரசு மருத்துவமனைகளில் "தனியார் பிரிவுகள்" திறக்கப்பட்டு தற்போது "ராக்கன் கேகேஎம்" என்று மறுபெயரிடப்பட்டிருப்பது முக்கிய பிரச்சினையைத் தீர்க்காத அணுகுமுறையாகும். அதாவது, சுகாதாரத்தைப் பண்டமாக்குதல் மற்றும் வணிகமயமாக்குதல் பொதுச் சுகாதார அமைப்பைப் பாதிக்கின்றது.  இதனால், உரிய பொதுச் சுகாதாரத்திற்கான நிதி ஒதுக்கீடு குறைக்கப்படும். அதற்கு, பதிலாக பொதுச் சுகாதார அமைப்பைத் தொடர்ந்து சேதப்படுத்தும், மேலும் அவர்களின் அடிப்படை உரிமையான தரமான சுகாதார சேவைகளைக் குடிமக்களிடமிருந்து கொள்ளையடிக்கின்றது.

மேலும், நம் நாடு " வயதாகும் சமுதாயத்தில்" அடியெடுத்து வைக்கும் போது, ​​பெரும்பாலான குடிமக்கள் தங்கள் வயதான காலத்தில் வருமான பாதுகாப்பு இல்லை. ஏனெனில், உலகளாவிய ஓய்வூதியம் இல்லை. ஊழியர்களின் சேமிப்பு நிதியில் (EPF) பங்களிக்கும் முறையான பணியாளர்கள் கூட, அவர்களுக்கு கண்ணியமான முதுமையை வழிநடத்த போதுமான முதியோர் சேமிப்பு இல்லை.

2. சமூகத்தை பிரிக்கும் இன அரசியல்

இன அரசியல் ஏற்கனவே மலேசியர்களுக்கு புதிதல்ல, ஏனென்றால் ஆளும் கட்சியாக இருந்தாலும் சரி அல்லது பிரதான எதிர்க்கட்சியாக இருந்தாலும் சரி, அரசியல்வாதிகள் பெரும்பாலும் ஆதரவைப் பெறவும், உண்மையான சமூக-பொருளாதார பிரச்சனைகளில் இருந்து மக்களின் கவனத்தை திசை திருப்பவும் இதைப் பயன்படுத்துகின்றனர். குறுகிய இன மற்றும் மத அரசியல் மக்களை பிளவுபடுத்தியுள்ளது மற்றும் மலேசியாவில் பல இன சமூகங்களுக்கு இடையே இறுக்கமான உறவுகளை உருவாக்கியுள்ளது. எனவே, நமது சமூகம் எந்தப் பின்னணியில் இருந்தாலும் சமூகத்தின் பொதுவான நலனுக்காக முன்னேறுவதற்கு இன, மத அரசியல் தடையாக உள்ளது.

3. ஜனநாயக சுதந்திரம் சிதைந்து வருகிறது

மடானி அரசாங்கத்தில் மக்கள் பிரதிநிதிகள் மற்றும் அமைச்சர்கள் பதவிகளை வகிக்கும் பல அரசியல்வாதிகள், கடந்த காலங்களில் ஒரு காலத்தில், நம் நாட்டில் ஜனநாயக நிலை நிறுத்துவதற்காக "சீர்திருத்தம்" காக கடுமையாகப் போராடினர். ஆனால், ஒருமுறை சீர்திருத்தம் என்ற முழக்கத்தை உரக்க முழங்கியவர் 2022 முதல் மடானி அரசை வழிநடத்திய பிறகு, ஜனநாயகத்தை வலுப்படுத்தவும், விரிவுபடுத்தவும், ஆழப்படுத்தவும் அரசியல் சீர்திருத்தமும் எங்கும் போவதாகத் தெரியவில்லை, ஜனநாயகத்திற்கான இடம் கூட மீண்டும் சுருங்கிவிட்டது. " “உணர்வுப்பூர்வமான பிரச்சினை” இதில் 3R அடங்கும்.

தேர்தல் முறையில் சீர்திருத்தம், அடக்குமுறை சட்டங்களை நீக்குதல் மற்றும் ஊழலுக்கு எதிராக போராடுதல் போன்ற நிறுவன சீர்திருத்தங்கள் நிறைவேற்றப்படாத வாக்குறுதிகளாகவே உள்ளன. மறுபுறம், ஊழல் மோசடிகளில் ஈடுபட்ட ஆளும் கட்சியின் தலைவர்கள் கிரிமினல் குற்றச்சாட்டுகளில் இருந்து விடுவிக்கப்படலாம், அதே நேரத்தில் நாட்டின் மோசமான ஆட்சியைக் கேள்வி கேட்கும் சமூக ஆர்வலர்களுக்கு எதிராக பேச்சு சுதந்திரத்தை கட்டுப்படுத்தும் சட்டங்கள் இன்னும் பயன்படுத்தப்படுகின்றன.

4. ஆபத்தான காலநிலை நெருக்கடி

உலகில் உள்ள அனைத்து மனித இனத்தையும் அச்சுறுத்தும் காலநிலை நெருக்கடியிலிருந்து மலேசியா நாட்டை விடுவிக்க முடியாது. இருப்பினும், காலநிலை நெருக்கடியைச் சமாளிக்க ஒரு மூலோபாயத்தை வகுப்பதில் மலேசிய அரசாங்கம் கார்ப்பரேட் வர்க்கத்துடன் இழுத்துச் செல்லப்படுவதாகத் தெரிகிறது.

சுற்றுச்சூழல் நெருக்கடியைக் கையாள்வதில் உண்மையில் தவறான தீர்வாக இருக்கும் ஒரு டெனோக்ரடிக் தீர்வை நடைமுறைப்படுத்த மலேசிய அரசாங்கத்தின் மீது செல்வாக்கு செலுத்த முயற்சிக்கும் தரப்புகள் உள்ளன. கார்பன் சந்தையைத் தள்ளும் அரசாங்கத்தின் திட்டம் மற்றும் "கார்பன் பிடிப்பு, பயன்பாடு மற்றும் சேமிப்பு" (CCUS)க்கான உள்கட்டமைப்பு கட்டுமானம், பெரிய கார்ப்பரேட் நிறுவனங்களின் தேவைகளை மட்டுமே பூர்த்தி செய்கிறது. காலநிலை நெருக்கடிக்கு. மாசுபடுத்தும் கார்ப்பரேட் நிறுவனங்கள் காலநிலை நெருக்கடியை மோசமாக்கும் கார்பனை தொடர்ந்து வெளியிடலாம், அதே நேரத்தில் இயற்கை காடுகள் மற்றும் பழங்குடி மக்களின் வழக்கமான நிலப்பகுதிகள் கார்பன் சந்தையில் லாபத்திற்காக வர்த்தகம் செய்யக்கூடிய பொருட்களாக மாற்றப்படுகின்றன.

5. ஏகாதிபத்திய சக்தியின் பிடி

மேலே பட்டியலிடப்பட்டுள்ள 4 அச்சுறுத்தல்களைத் தவிர, மலேசியர்கள் உலக முதலாளித்துவ நெருக்கடி மற்றும் உலக வல்லரசுகளின் போட்டியின் அச்சுறுத்தல்களுக்கு ஆளாகிறார்கள். பாலஸ்தீன மக்களுக்கு எதிராக இஸ்ரேலின் சியோனிச ஆட்சி செய்த இனப்படுகொலை குற்றங்கள், உக்ரைனுக்கு எதிரான ரஷ்யாவின் ஆக்கிரமிப்புப் போர், சூடானில் போர், மியான்மர் போர் மற்றும் பல, உலகின் பெரும் வல்லரசுகள் மறுசீரமைக்க முயற்சிப்பதால் இன்னும் தொடர்கின்றன. ஆளும் வர்க்கத்தின் பொருளாதார மற்றும் மண் சார்ந்த அரசியல் நலன்களை அடிப்படையாகக் கொண்ட உலக ஒழுங்கு என்பது ஒவ்வொரு சாதாரண மக்களின் வாழ்க்கை மற்றும் இறப்பை பற்றி கவலைப்படாததாகவே இருக்கின்றது.

அமெரிக்கா தலைமையிலான மேற்கத்திய ஏகாதிபத்திய சக்திகளுக்கும் அந்தந்த நாடுகளின் (ரஷ்யா மற்றும் சீனா போன்ற) ஆளும் உயிரடுக்கின் நலன்களைப் பாதுகாக்க முயற்சிக்கும் தரப்பும் வளர்ந்து வரும் சக்திகளுடன் போட்டியிடுவதால் பல இடங்களில் ஆசியா பசிபிக் நாடுகள் உட்பட நிச்சயமற்ற புவிசார் அரசியல் சூழ்நிலை உருவாகியுள்ளது. பெரும் ஏகாதிபத்திய சக்திகள் தீவிரமான புவிசார் அரசியல் போட்டியில் ஈடுபடும் மூன்றாம் உலக வளரும் நாடுகளை தங்கள் பக்கம் கட்டாயப்படுத்தி இழுக்க முயல்கின்றது. மலேசியா போன்ற மூன்றாம் உலக நாடுகள் தங்கள் சொந்த சமூக மற்றும் பொருளாதார திறன்களை வளர்த்துக் கொள்வது முக்கியம். ஏனெனில், எந்த ஒரு வெளிநாட்டுச் சக்தியையும் சார்ந்து இயங்கக்கூடாது என்பதால். மேலும், பிராந்திய மற்றும் மூன்றாம் உலக நாடுகளுக்கு இடையான மோதல்களுக்கு இழுக்கப்படாமல் இருக்கும் வகையில் நெருக்கமான ஒற்றுமையை வளர்ப்பது, மக்களுக்குப் பயனளிக்காத பெரும் பிரச்சனையிலிருந்து தப்பித்துக் கொள்ள உதவும்.

ஒரு முற்போக்கான மாற்று வழிக்காக நாம் தொடர்ந்து போராட வேண்டும்.

பெரும்பான்மை மக்களுக்கு எதிராக தொடர்ந்து வரும் அச்சுறுத்தல்களை எதிர்கொள்வதற்கும் அவற்றைச் சமாளிப்பதற்கும், கீழ்க்கண்ட சிந்தனைகளின் அடிப்படையில், சாமானிய மக்கள் இயக்கத்தையும், முற்போக்கான மாற்று அரசியலையும் கட்டியெழுப்ப நாம் தொடர்ந்து பாடுபட வேண்டும்.

- முற்போக்கான வரிவிதிப்பு முறையின் நிதியுதவியுடன், பொதுச் சேவை அமைப்புகளை (சுகாதாரம், கல்வி போன்றவை) வலுப்படுத்தும் கொள்கைகள் மற்றும் விரிவான சமூகப் பாதுகாப்பு (முதியோர்களுக்கான உலகளாவிய ஓய்வூதியம் போன்றவை) மூலம் சமூகத்தின் செல்வத்தை மறுபங்கீடு செய்யும். அது பெரும் பணக்காரர்கள் சரியான வரி செலுத்துவதை உறுதி செய்கிறது.

- வாழ்க்கை ஊதியம், வேலைப் பாதுகாப்பு, சிறந்த பொது சுகாதார அமைப்பு, சிறந்த தேசிய நிர்வாகம் போன்ற பொதுவான பிரச்சினைகளுக்காகப் போராடுவதற்கு இன, மத எல்லைகளைக் கடந்து மக்கள் இயக்கத்தை உருவாக்குவதன் மூலம் அனைத்து இன அரசியலையும் நிராகரிக்கவும்.

- ஒரு பரந்த மற்றும் ஆழமான ஜனநாயக வெளி, இதனால் சாதாரண மக்கள் அன்றாட வாழ்க்கை தொடர்பான முடிவெடுக்கும் செயல்பாட்டில் ஈடுபட முடியும். உள்ளூராட்சி மன்றத் தேர்தலை மீட்டெடுப்பது உள்ளிட்ட அரசியல் ஜனநாயகம் அடிமட்டத்துக்கு விரிவுபடுத்தப்பட வேண்டும்.

- கார்ப்பரேட் நலன்களின் செல்வாக்கிலிருந்து விடுபட்ட சுற்றுச்சூழல் பாதுகாப்பு கொள்கைகள் மற்றும் நடவடிக்கைகளை செயல்படுத்துதல். புதுப்பிக்கத்தக்க எரிசக்தி ஆதாரங்களுக்கு மாறுவதற்கான உண்மையான முயற்சிகளை ஊக்குவித்தல், பொதுப் போக்குவரத்து முறையை மேம்படுத்துதல், காடுகளைப் பாதுகாத்தல் மற்றும் நிலையான வளர்ச்சிக்கு உத்தரவாதம் அளிக்கும் பிற விஷயங்களில் காலநிலை நெருக்கடியைச் சமாளிக்கும் முயற்சிகளில் சமூகத்தின் அனைத்துப் பிரிவினரையும் ஜனநாயக ரீதியாக அரசாங்கம் ஈடுபடுத்த வேண்டும்.

- அனைத்து மக்களின் பொதுவான நல்வாழ்வுக்கான பரஸ்பர மரியாதை மற்றும் ஒற்றுமையின் உணர்வை அடிப்படையாகக் கொண்ட சர்வதேச உறவுகளை உருவாக்குவது. 2025-இல் தென்கிழக்கு ஆசிய நாடுகளின் சங்கத்தின் (ASEAN) தலைவர் என்ற முறையில், மர்ஹேன் சார்பு பிராந்தியக் கொள்கையை உருவாக்குவதை ஊக்குவிப்பதில் மலேசிய அரசாங்கம் ஒரு பங்கைக் கொண்டுள்ளது. காலநிலை நெருக்கடி, சமூக அநீதி, போர், அகதிகள் நெருக்கடி போன்ற தேசிய எல்லைகளைக் கடந்த மற்றும் பல்வேறு சவால்களைச் சமாளிக்க தென்கிழக்கு ஆசியப் பிராந்தியத்திலும் உலகின் பிற பகுதிகளிலும் உள்ள தேசிய அரசாங்கங்கள் ஒன்றிணைந்து செயல்பட வேண்டும். ஆக்கிரமிப்பு, பிற நாடுகளுக்கு எதிராகப் போரைத் தொடங்குதல் மற்றும் ஒரு சமூகத்திற்கு எதிராக இனப்படுகொலைக் குற்றங்களைச் செய்யும் எந்தவொரு அரசாங்க ஆட்சிக்கும் அனைத்து ஆதரவையும் (நிதி மற்றும் ஆயுதம் போன்றவை) நிறுத்துவதில் நாம் உறுதியாக இருக்க வேண்டும்.

உண்மையான சுதந்திரமான, ஜனநாயக, சமத்துவ, நியாயமான மற்றும் வளமான சமுதாயத்தை உருவாக்க, ஒரு முற்போக்கான மாற்றீட்டை உணர, நாம் தொடர்ந்து மக்கள் சக்தியை அடிமட்டத்திலிருந்து கட்டியெழுப்ப வேண்டும். இன்றைய பெரும் சவால்களைச் சமாளிக்க நமக்கு குறுக்குவழிகள் இல்லை. விரிவான மாற்றம் என்பது திடீரென்று தானாக வராது, அது நேர்மையான, விடாமுயற்சியான, உறுதியான, துணிச்சலான, பொறுமையான, நிலையான மற்றும் தீவிரமான போராட்டத்தால் மட்டுமே நிகழும். 

புத்தாண்டு வாழ்த்துகள் மற்றும் தொடர்ந்து போராடுங்கள்!

எழுதியவர்: சூ சோன் காய்

மத்திய குழு உறுப்பினர்

மலேசிய சோசலிசக் கட்சி (PSM) 

தமிழில் : மோகனா